ភ្នំពេញ៖ ឧបនាយករដ្ឋមន្ត្រី និងជារដ្ឋមន្ត្រីក្រសួងយុត្តិធម៌ លោក កើត រិទ្ធ បានបញ្ជាក្រុមការងាររបស់ក្រសួងចុះស្រាវជ្រាវដោយផ្ទាល់លើករណីរំលោភបូកលើក្មេងស្រីម្នាក់នៅខេត្តសៀមរាបជាបន្ទាន់ ដើម្បីស្វែងរកយុត្តិធម៌ជូនជនរងគ្រោះ។

ការចេញបញ្ជានេះធ្វើឡើងភ្លាមៗក្រោយទទួលបានព័ត៌មានស្ដីពីករណីមនុស្ស២០នាក់ចាប់រំលោភលើក្មេងស្រីអាយុ១៥ឆ្នាំម្នាក់ ហើយឪពុកជនរងគ្រោះត្រូវបានចាប់ឃុំខ្លួនថែមទៀតក្រោយប្រើហិង្សាលើជនសង្ស័យ។ 

យោងតាមការបង្ហោះរបស់ប្រធានអង្គការ Afesip លោកស្រី ម៉ម សុម៉ាលី ឲ្យដឹងថា៖ «ក្មេងស្រីអាយុ ១៥ឆ្នាំត្រូវរំលោភបូករហូតដល់ទៅ ២០នាក់យ៉ាងព្រៃផ្សៃពេលសមត្តកិច្ចចាប់បានជនល្មេីស ពុកបង្កេីតខឹងពេកក៏វាយទៅអ្នកបង្ករ ពេលនេះពុកត្រូវជាប់គុក រីឯជនល្មេីស១៤នាក់នៅក្រៅឃុំ សៀមរាប»។ 

នៅថ្ងៃនេះផងដែរប្រធានក្រុមមេធាវីស្ម័គ្រចិត្ត សម្តេចតេជោសែនលោក គី តិច ក៏បានចាត់ អនុប្រធានក្រុមមេធាវីស្ម័គ្រចិត្តសម្តេចតេជោសែនទទួលបន្ទុកខេត្តសៀមរាប ដើម្បីស្រាវជ្រាវករណីខាងលើអោយបានច្បាស់។ 

ក្នុងករណីដែលអ្នកស្រី ម៉ម សុម៉ាលី ពឹងពាក់បន្ថែមមកកាន់មេធាវីស្ម័គ្រចិត្តសម្តេចតេជោ គឺត្រៀមដើម្បីជួយការពារក្តីដល់កុមារី និងគ្រួសាររងគ្រោះ៕